周一嶽終於滾蛋 香港人終於甩難

重大消息！天大喜訊！人稱「每周一鑊」嘅食衞局局長周一嶽終於滾蛋！

嗱，周一鑊滾蛋關乎全港福祉，呢個好消息係佢自爆嘅。周一鑊尋日首次正式承認，唔會留任下屆政府。即係話，呢位搞到香港人「生老病死」冇樣安樂嘅超級大庸官，七月一日就講拜拜。大家話嘞，呢個係咪天大喜訊吖，叮！

八年嘞，周一鑊做官咁耐，市民就受罪咁耐，唔係疫症爆發，就係庸醫害人；唔係有毒食物氾濫成災，就係雙非問題亂象叢生。更加唔好講骨灰龕位長期嚴重短缺，搞到港人死無葬身之地。周一鑊好似一部災難警報器，出嚟講親都無好嘢，唯一帶畀市民嘅好消息，就係佢執包袱離開政府，都咪話唔諷刺。

最諷刺嘅係周一鑊冇為多年罪責表示歉疚，反而自吹自擂，話任內處理過唔少棘手問題喎，好似豬流感同雙非問題等等。真係唔知畀佢嚇死，知就畀佢笑死。豬流感惡菌殺入香江，正正就係因為佢把關失職，害人害物。講到雙非問題，如果唔係候任特首梁振英一句「雙非孕婦零配額」，唔知周一鑊仲要渾渾噩噩到幾時。

叮佢個鎯鎯，香港出咗個「第一貪官」曾蔭權，又出咗個「第一庸官」周一鑊。如果問回歸十五周年有乜值得慶祝，就係呢對官場極品一齊落台，香港人飲得杯落！

講到呢度，太一叮記起一件事，就係周一鑊曾經唔要面到公開「求官」，話希望過渡新政府。嗱嗱嗱，香港第一庸官下崗，理由不外乎兩個嘅啫。一係，周一鑊仲有少少自知之明，所以自我了斷。一係咯喎，候任特首梁振英用人唯才，堅決要叮走佢。實情係點，佢自己梗係擰頭擰髻唔肯講啦，不過，換轉你做下屆特首，你會唔會留低呢件政治負資產？

人走茶涼，周一鑊可能不甘寂寞啦，居然公開評論內地民運人士李旺陽死亡事件，話從醫生角度，覺得事件有兩大疑點喎。嗱，李旺陽事件有冇疑點，大家心知肚明，但係一國兩制之下，問責官員係不適合評論內地敏感政治事件嘅，周一鑊嘅政治智慧有幾高，不問可知。

點都好啦，周一嶽終於滾蛋，香港人終於甩難。周一嶽，你執包袱滾蛋之日，一定唔會寂寞o架，香港人會歡天喜地燒炮仗送你走，叮！