政壇：搞搞政：劉夢熊空降港島阿牛讓路?

建制派尋日傳來消息，話外號「Dream Bear」嘅全國政協委員劉夢熊亦有意參選立法會港島區直選，但不獲北京認同，仲話佢同社民連成員「阿牛」曾健成有秘密交易添！

劉夢熊一向有捐錢畀阿牛所屬嘅保釣行動委員會，仲不時一齊就保釣問題遊行示威同開記者會，有傳阿牛今屆決定離開港島老巢，空降新界西參選，將港島區讓畀劉夢熊。消息又話北京對佢參選好有保留，認為佢一定唔夠票當選，但就會分薄其他建制派票源。

佢接受查詢時直認有意參選，仲話最近有好多人勸進佢，包括佢幫過手反對村屋僭建登記制度嘅元朗鄉事派，佢仲未決定會去港島、新界西或新界東，月底就會拍板，又話冇聽到有人勸退佢，質疑放料者想「毒死」佢！佢又強調同阿牛只曾就保釣合作，本港事務上佢同發動「五區公投」嘅反對派無偈傾喎，否認秘密交易之說。