政壇：狄勤思工作成籮勢續約
證監會「打虎英雄」，法規執行部執行董事施衛民九月約滿，政府會唔會同佢續約，備受市場關注外，另一位同樣做監管工作嘅港交所上市科主管狄勤思，聽聞亦會喺短期內約滿，究竟狄勤思留唔留任，外間亦非常關心。
上市科依家仲有多個項目進行緊，多份諮詢文件準備出爐，份清單最少包括窩輪市場監管改革、簡化海外企業來港第二上市、同上市公司中途停牌機制等等，樣樣嘢都對市場影響深遠。手頭大把嘢要搞，唔怪得市場人士咁關心狄勤思嘅去向啦！外界成日話自港交所行政總裁李小加上任後，港交所高層車輪咁轉，今次會否打破宿命，不久將來會揭曉！
