政壇：張文光廢噏護短

我哋踢爆白鴿黨有黨員申請做下屆政府嘅副局長同政治助理之後，包括該黨主席鐵頭仁助理在內等四名黨員尋日就急急腳走出嚟補鑊，「耍冧」兼承認事前並冇通知黨中央。鐵頭仁曾經公開講過，喺未有普選前佢哋嘅黨員都唔會加入政府，呢幾隻乳鴿公然作反，擺明拆鐵頭仁個台，認真肉酸。

醜婦終須見家翁，四名黨員區諾軒、柴文翰、羅健熙同林嘉嘉尋日喺張文光陪同下見傳媒，承認佢哋的確係有應徵做副局長同政助，而且仲冇知會個黨，佢哋都覺得有疏忽，同埋對喺黨內產生混亂感到抱歉咁話。不過羅健熙就話佢哋咁樣做其實都係應電子傳媒嘅邀請，想挑戰同測試一下個遴選程序係咪公正，並唔係有心加入政府喎。而佢哋遞交嘅申請都係石沉大海，音信全無，所以亦達唔到測試效果。

身為老鴿嘅張文亦都有幫班乳鴿講好說話，話件事雖然令到白鴿黨好尷尬，但係佢哋四個後生仔都係立場堅定，所以對佢哋毫無懷疑。仲強調香港未有普選之前，白鴿黨唔會加入政府咁話喎。佢又話遲啲會向立法會補番利益申報。

馮煒光潛水惹遐思

嗱！張文都親口話黨員唔會加入政府，咁呢幾隻乳鴿申請做副局同政助有冇違反黨紀先？似乎冇講清楚喎！咁係咪想護短呀？係嘅話就醜上加醜喇！

班乳鴿就話立場堅定，但係同樣畀我哋質疑佢申請做副局同政助嘅馮煒光尋日就冇蒲頭。馮煒光原本講明想選超級議席，但因為冇人撐被迫放棄。佢會唔會意興闌珊，轉投政府真係冇人知。尋日仲潛咗水，真係惹人遐思。

不過，張文尋日就向所有黨員發出短訊，問清楚仲有冇黨員申請局長同政助，聽聞暫時冇人回覆，擺明係補飛啦！