送瘟神不必擦鞋 林秉恩咪返轉頭

「借問瘟君欲何往，紙船明燭照天燒。」毛澤東寫過一首《送瘟神》，用嚟表達消滅疫災嘅喜悅心情。太一叮今日借花敬佛，將呢首詩送畀衞生署署長林秉恩。

點解？林秉恩在位九年，搞到香港多災多難，乜嘢禽流感、豬流感、手足口病、腸病毒……攻陷香港嘅疫症大軍，條隊仲長過銅鑼灣瘋搶限量版波鞋嘅人龍，家陣佢終於退休，香港人仲唔係送瘟神？

常言道，瘟神易請難送，估唔到瘟神署長臨走一樣搞風搞雨。林秉恩聽日正式執包袱走人，佢擔任總監嘅醫療輔助隊為咗擦鞋，竟將檢閱會操同總區步操夾硬安排喺同一日上演，好送林秉恩最後一程。結果，為咗一個人發官瘟，就要二千人喺雷暴警告同滂沱大雨下比賽。

有隊員踢爆，尋日雷雨交加，正常而言活動應該延期，無理由逼隊員做落湯雞，喺又濕又滑嘅地面冒險比賽㗎嘛。仲有呀，據聞唔少隊員仲係受到上級嘅無形壓力而「被迫自願」出席。嘩，咁仲成世界嘅？小小署長已經咁大官威，佢嘅上司、人稱「每周一鑊」嘅食衞局局長周一嶽被叮走，香港使唔使搞萬人巡遊呀？

林秉恩退休，醫療輔助隊隊員唔止肉體受罪，荷包一樣大出血。輔助隊喺紅磡酒家設宴歡送林秉恩，每名隊員要夾錢畀面派對，又係阿頭叫到，唔去唔得。

嗱嗱嗱，林秉恩貪威識食，搞到醫療輔助隊隊員怨聲載道事小，如果一個唔覺意，搞到全港市民雞毛鴨血事大。日前之嘛，衞生署為林秉恩搞歡送宴，可能樂極忘形啦，結果奪命禽流感襲港咁大件事，消息居然延遲咗三個半小時發布，唔係草菅人命又係乜！萬一禽流感蔓延，林秉恩咪以為摘下烏紗就唔使負責呀，想風風光光告別大步操？市民齊齊操到你上天花板就差唔多，叮！

叮佢個鎯鎯，林秉恩退休不甘寂寞，使乜要衞生署設宴餞別，使乜搞醫療輔助隊大步操吖？講真啦，市民早就奔走相告，開晒香檳慶祝啦。閣下執掌衞生署九年，從未做好呢份工，唔好話疫症爆不停，單係發霉藥、假藥、未註冊藥周街賣，就已經夠害人不淺。所以話啫，庸官正式滾蛋，全香港真心誠意歡天喜地送你走！

《送瘟神》話，紙船明燭照天燒。紙船明燭市民就冇嘞，就喺呢度同林秉恩話別：好行夾唔送，走咗千祈咪返轉頭呀，叮！