政壇：政商定格：港名廚遠征波爾多
為期四日嘅波爾多紅酒節本月二十八日揭幕，波爾多市邀請香港作為榮譽城市參與其中。為咗把握呢個宣傳香港嘅大好機會，旅遊發展局召集城中四間知名食府嘅廚藝大師組成美食兵團，遠赴當地炮製特色美食。
美食兵團早幾個月前就開始研究菜式，其中六國酒店中菜行政總廚馬榮德，將一款原為釀蟹蓋嘅熱葷菜式，改作名為「羅漢金甲」嘅素菜。馬師傅嘅難題係法國政府對於食品嘅入口管制非常嚴格，而法國人冇乜見過蟹蓋，所以運送蟹蓋至當地必會遇上海關嘅阻滯，好彩蟹蓋當係容器而唔係食物，至可以過關。蟹蓋裏面釀嘅會係米飯蛋白配上松茸菇菌，再覆以南瓜蓉加芝士粉焗製。
由於唔准明火煮食，帝苑酒店中菜部行政總廚何偉成煮豉椒味菜爆雞球，甜椒味菜與雞肉都係快熟嘅，甜甜酸酸嘅味道又正合老外嘅胃口。
馬榮德嘅名菜羅漢金甲，以蟹蓋作容器。
何偉成呢味豉椒味菜爆雞球，應該啱晒老外胃口。