政壇：貪曾吹「水」死撐回歸騷

東方報業集團日前獨家踢爆特首曾蔭權爵士貪到盡荒廢政事，連回歸十五周年嘅紀念活動都懶得搞，嚴重失職。貪曾政府終於都要急急補鑊，好鬼祟咁喺政府新聞網度新增回歸十五周年專頁，介紹部分回歸活動，仲拍咗條短片供市民瀏覽。以往特首唔會親身上場宣傳活動，今次貪曾居然親自撰文介紹，企圖掩飾佢嘅過失，但篇嘢嘅內容就同佢為官態度一樣hea到爆，寫咗等於冇寫。

秘密花園寸深圳「禮賓府」？

以往每逢七一將至，街上都會張燈結綵，逢五及十周年，政府更會開記招高調宣傳紀念活動，但東方報業集團日前發現，今年回歸十五周年，政府唔多公布活動安排，街上亦未見相關布置，氣氛冷清清。政府新聞網尋日新增嘅回歸十五周年專頁，內文劈頭第一句就死撐「走在街上，不難見到各區的燈柱上飄揚着數以千計的彩旗」，就算街上有彩旗，都係急急咁掛嚟補鑊。文中更加隻字不提新政府上場，梗係啦，七一係貪曾下台之日，梗係刻意迴避傷心事。

網頁上載咗逾三百項紀念活動。點解有咁多？咪將創造健力士世界紀錄嘅青年大匯演、龍舟賽同升旗禮、煙花匯演、大巡遊等掃埋一碟篤數啫，但最騎呢嘅係「港島西雨水排放隧道及荔枝角雨水排放隧道啟用禮」，明明係防洪措施，同回歸大纜都扯唔埋，咁都當做紀念活動，令人啼笑皆非。

政府仲將「乾隆皇帝的秘密花園」展覽當係紀念活動，呢個秘密花園，據講係乾隆諗住興建嚟退休，頤養天年之用，足足花咗近二十年時間建成。

講到退休，不期然令人諗起貪曾早前偷偷地以超值價租住深圳東海花園超豪複式住宅，作為退休後入住嘅「禮賓府」，可惜畀東方報業集團揭發佢嘅醜行後，令佢冇得住呢個「秘密花園」之餘，仲惹埋一身蟻。政府喺呢個時候舉辦「秘密花園」展覽，都唔知係攞景定贈興嘞！