醫局診所毀病歷 離岸官僚無靈魂

本港公營醫療系統，一個「亂」字概括晒。高層冇靈魂，前線失晒魂，搞到醜聞不斷，亂象環生，鑊鑊新鮮鑊鑊甘。

呢，話口未完又爆醜聞喇。醫管局轄下紅磡診所大擺烏龍，無端端將約萬名病人二○○三至○五年嘅舊病歷銷毀，導致呢批病人紀錄不全，日後求診，醫生可能因為冇病歷參考，只能靠估斷症，後果可大可小，尤其對長期病患者影響更大。

九龍中醫院聯網仲死撐，話已按處理機密文件嘅程序處理，並無病人資料外洩喎。叮！衰就要認，打就企定，冇洩漏資料唔等於對病人冇影響。幾個月前之嘛，聯合醫院就有六百名精神科病人嘅病歷副本不翼而飛，如果唔係醫管局管理亂晒龍，公立醫院又點會接連發生咁嘅醜聞吖？

講開又講，管理混亂呢家嘢，簡直係港府衞生官僚嘅頑疾。身為問責官員嘅食衞局局長周一嶽無品無能，渾渾噩噩，出咗名叫「每周一鑊」，其實佢嘅手下衞生署署長林秉恩亦係一擔擔嘅咋，臨退休仲要衰多幾鑊，除咗管理不善，更加狂花公帑，洗腳唔抹腳。

林秉恩任內藥物醜聞爆不完，佢誓神劈願要加強監管，講到天花龍鳳，可惜做就無心無力。嗱，藥物辦公室增加人手，一個部門居然分三個地方辦公，開個會都要車來車去，浪費金錢及時間之餘，效率亦大打折扣，根本就係攞嚟搞。

最離譜就係，林秉恩好嘅唔學，曾蔭權貪威識食嗰一套就學到十足，唔怪得畀人叫「大花筒」。呢嗱，淨係本財政年度，佢已經外訪咗十六次，花費近四十萬元，遠超上年度嘅廿八萬元；同期宴客更達四十八次咁多，大拿拿使咗超過卅五萬元公帑。

即使臨近退休，佢都要盡地一歎，除咗飛去瑞士「公幹」，更大搞退休晚宴，唔通真係食得唔好嘥？有立法會議員質疑佢「嘢就做唔多，錢就使好多」，真係一啲都冇鬧錯。煲呔曾豪遊列國，畀人叫「離岸特首」，林秉恩做「離岸署長」，半斤八両，都算實至名歸咯，叮！

衞生高官不務正業，成日掛住飲飲食食，假公濟私，周圍遊埠，唔怪得公立醫院亂七八糟，藥物醜聞無日無之，醫療事故無奇不有，正如有人話齋，沒有最恐怖，只有更恐怖。太一叮都係嗰句，煲呔曾、周一鑊同林秉恩呢班庸官早走早着，咪再阻住個地球轉喇，叮！