政壇：第三跑道恐變富豪專線

坐豪華遊艇、搭私人飛機周圍去歎世界嘅貪曾，置市民大眾利益不顧，連天文台前台長「黑英」林超英亦曾炮轟貪曾不是，呢兩日佢更喺網誌論證政府力推喺機場興建第三條跑道，其實只係為咗用嚟「服侍」鍾意搭私人飛機嘅富豪，最終只會淪為富豪享受，市民難受。

貪曾咁鍾意搭私人飛機，政府係咪受佢所託起第三條跑道冇人知。但為環保不遺餘力嘅黑英尋日喺網誌列舉數字，指最初起赤鱲角機場時嘅設計指標係八千七百萬人次、貨運量九百萬公噸、三十八萬架次，而興建第三條跑道嘅指標係九千七百萬人次、貨運量八百九十噸、六十萬架次。佢話新指標「人次增加約一成，貨運量稍減，架次卻增加超過五成，完全不符合比例」。

黑英又話世界嘅趨勢係民航機載客量愈嚟愈大，按道理客量增加一成，架次係唔會增加一成。對於呢個畸形增長，佢就話唯一嘅解釋就係架次五成嘅增幅係嚟自載客量極少嘅私人飛機。

白海豚嘗苦果

政府起第三條跑道要花費逾千三億元公帑、造成無數環保問題。黑英批評當局只係為咗服務少數嘅富豪，「甜果」就由有「特權」嘅人享受，「苦果」就要全港大眾同可愛嘅中華白海豚承受，仲引用咗環保局宣傳停車熄匙嗰句「你就享受，我就難受」，係實實在在嘅重大社會不公義。

除寸爆環保局局長邱騰華外，黑英仲呼籲市民一定要向不公義說不，把握最後機會喺本月十一日環評報告諮詢截止前，向環保署署長提交反對意見。再加上環保團體對環評報告反對聲音高漲，又睇吓邱騰華點做嘞！