停車熄匙一場騷 氣候逃犯仍在逃

香港回歸十五年，「港人治港」變「講人治港」，管治靠吹水，施政假大空。奉行呢套吹水治港路線嘅佼佼者就係曾蔭權，乜嘢六大產業，乜嘢十大基建，當初吹到天花龍鳳，最後變咗無影無蹤。

嗱，上有好者，下必甚焉。煲呔曾崇尚吹水管治、門面施政吖嘛，下面班官僚自然有樣學樣，其中一個忠實信徒係環境局局長邱騰華，典型例子就係停車熄匙。

停車熄匙淪為門面政策，睇一件事就知：措施實施咗半年，至今仍然零檢控！大家無睇錯，係零檢控，一宗檢控個案都無。點解會咁嘅呢？唔通駕駛人士突然人人變晒環保先鋒、守法模範？係就梗係好啦，可惜事實唔係咁。

停車熄匙零檢控，原因其實好簡單，就係執法虛有其表！環保署條法例係咁寫嘅，執法人員要近距離目擊司機停車無熄匙三分鐘，先至能夠提出檢控。喂，正如環保組織批評，環保署咁執法「仲難過捉人隨街吐口水」，除非違規司機係盲嘅啫，見到咁大塊人肉紙板戙喺度三分鐘，仲唔即刻熄匙，避過檢控咩？

執法形同虛設，環保署點解釋呢？佢哋話，強制停車熄匙係要令司機養成良好習慣，唔係為咗檢控懲罰喎。哈，如果世界咁美好，香港就唔會變咗「污染之都」啦，如果人人咁自律，煲呔曾就唔會變成氣候逃犯啦。執法不嚴等如鼓勵犯法，咁都唔明，你話環保官僚抵唔抵叮吖？

叮佢個鎯鎯！停車熄匙執法得個樣，例子隨手都搵到。有報道講，環保署署長王倩儀運用酌情權，准許八個機構以醫療理由豁免轄下共二百架車遵守停車熄匙規例。一方面執法困難，對違規司機無晒符；一方面亂咁豁免，對機構車輛放晒水，停車熄匙法例變成無牙老虎，仲唔係廢嘅咩？叮！

講到尾，停車熄匙只係一場環保騷嚟啫，整色整水，虛應故事，無非想為港府「治污」無方遮醜。夏季臨近，停車熄匙形同虛設，大家行街袋定紙巾掩鼻啦！

見微知著，由一個停車熄匙立法徒具虛名，就睇到夕陽政府施政係幾咁窩囊。空氣污染固然搞唔掂，反而搞到官場政壇烏煙瘴氣，經濟民生千瘡百孔，社會發展停滯不前。

嗱嗱嗱，夕陽政府大限就快到嘞，唔該下屆政府揸正來做，咪放縱曾蔭權同邱騰華兩個氣候逃犯逍遙法外，叮！