政壇：搞搞政：李國寶去到邊瞓到邊

立法會有「四大懶蟲」，其中一個係金融界李國寶，出席立法會更有幾個出晒名嘅風格，譬如「三點不露」（冇三點唔見人）、「快閃」等。除此之外，佢瞌眼瞓亦好常見，坐耐少少就即刻現形，甚至公然瞓着覺添！原來佢唔單止喺立法會有呢個現象，尋日出席個公開場合，李國寶又畀睡魔急call。

煤氣公司尋日下午喺中環ifc舉行一百五十周年慶祝活動，李國寶都獲邀出席，但坐喺台下嘅佢，唔知係咪之前午餐食得飽得滯，受睡魔引誘下不斷「釣魚」，醒吓瞓吓，喺大孖沙面前出醜，真係有損立法會形象。

話說尋日煤氣公司職員喺台上發表講話，台下嘅李國寶成個睡眼惺忪嘅樣就出晒嚟，其後更突然畀睡魔急call，不斷喺度「釣魚」，之後更索性合埋對眼約十秒，幾經努力先睜番開半隻眼，認真唔好睇。李國寶喺立法會嘅作風大家已經見怪不怪，但出席人哋活動都咁瞓法，不如快啲返屋企瞓覺罷啦，相信到時想點瞓法都無人理佢！