政壇：青年就業難張宇人賴28蚊
政府發表人口政策報告書後，立法會內務委員會尋日召開特別會議討論呢碟遲咗十年先至出台嘅炒冷飯，議員發言唔少，但有質素嘅似乎就唔覺，有啲仲令人覺得係抽水歪論嚟。
好似報告揭示十五至十九歲年齡組別嘅失業率有百分之十一咁高，工業界林大輝分析呢個現象時，話年輕人失業問題反映政府對中小企支援不足，事關中小企無錢請人，年輕人咪失業囉！
飲食界張宇人更加得人驚，佢話當日一早叫咗政府唔好一刀切，將最低工資定喺時薪二十八元，僱主對住一啲十六、七歲、而且毫無工作經驗嘅後生仔，又點會肯畀二十八元時薪吖，所以歸根究柢，話年輕人失業嘅問題都係由最低工資引發喎。
雖然佢哋來自工商界，立場一定會傾向業界，但將青年失業問題賴喺政府同最低工資身上，的確令人大開眼界！
張宇人