政壇：工聯會兩面受敵立選告急
立法會九月選舉，泛民內訌，建制派亦爆「鬼打鬼」爭位好戲。政圈大局可見，建制派將出最少三個人爭超級區議會，工聯會榮譽會長陳婉嫻更被認定穩坐票王之位，但有重量級政界人士就分析，民建聯安排立法會議員李慧琼（Starry）出嚟爭超級區議會議席，實扯走嫻姐唔少票。
除咗超級區議會選舉，九龍東亦有隱患，代表工聯會嘅立法會議員黃國健將競逐連任九龍東議席，點知旅遊界議員謝偉俊（Paul）又話要空降參選，由於阿Paul得到西環配票支持。地區消息更話，阿Paul近來唔滿足已獲分配嘅區分，不時「跨區」拉票，搞到建制派內部都怨聲載道。據聞，工聯會依家最怕就係選民唔識投兩票，已密密透過地區樁腳加緊教導選民。