政壇：袁彌明幫劉嗡執靚個Look
九月立法會選舉係政壇重頭戲，人民力量同社民連都積極準備。日前人民力量就出動最識扮靚嘅前港姐袁彌明（Erica）發揮專業技能，幫劉嘉鴻（劉嗡）換個新Look。
劉嗡將代表人民力量出戰，Erica日前就陪佢去配副新眼鏡，仲用手機幫佢影低個Look擺上社交網站facebook，有網友睇到之後，即刻叫Erica幫劉嗡執盡啲，仲話要佢改埋啲小動作喎。
社民連亦積極備選，副主席吳文遠就出咗張海報招請「臨記」，起初以為佢哋只係玩嘢，但原來係想搵義工。吳文遠話，做呢份工最緊要係心中有火，仲要預咗「畀阿伯鬧、畀阿婆藐、畀民建×圍」，佢仲試過畀人掟雪糕咁話。不過，佢哋請「臨記」係無糧出嘅，咁辛苦嘅工仲話要大量請人，睇怕唔係咁容易。