政壇：阿基蔣麗芸搵CY搶票

九月立法會選舉嘅前哨戰已經上演，民協立法會議員馮檢基尋日帶咗班少數族裔人士，去候任特首辦同CY見面，同行仲有平機會主席林煥光。阿基係平機會專責相關問題嘅委員會召集人，事後佢猛講同CY會面講啲乜。不過，候任特首辦尋日仲嚟咗另外一批少數族裔關注者，佢哋就係建仔副主席蔣麗芸等人。兩批人前腳搭後腳爭住見CY，目的都係拉攏少數族裔人士支持者，為乜嘢？大家心照喇。

大讚CY態度好

政圈傳咗好耐，建仔嘅阿Ann可能喺九月落地區直選，睇中嘅選區就係九龍西，而呢一區正係阿基嘅老巢。雖然政圈有傳阿基可能選超級區議會議席，但九龍西係民協嘅大票倉，抓緊當區支持者，尤其係區內人數唔少嘅少數族裔票，對佢本人同個黨都相當重要。

只不過佢出招快，但對手都唔慢，仲撞埋同一日就好弔詭，似乎政黨就選舉嘅互相較勁，已經有由暗中升級到上枱面嘅趨勢。

最搞笑嘅係，KK見完CY之後，大讚CY態度好過教育局局長孫明揚，佢話之前都約過孫公講少數族裔嘅教育問題，但孫公就只聽唔講，搞到佢好似對牛彈琴咁。曾經爭取做特首候選人嘅阿基仲話，佢嘅意見其實同CY政綱好似，希望盡快落實政策咁話。

阿Ann就話，自己其實係經民建聯少數族裔委員會安排一齊去見CY嘅，我哋問佢係唔係出選九龍西？佢就承認積極考慮緊，不過因為知名度唔及現任嘅李慧琼同梁美芬，所以落住區見下街坊先。

阿Ann仲話，佢先生不嬲都好清楚自己鍾意服務社會，大力鼓勵佢，又話佢哋兩個都仲好年輕力壯，唔使成日陪喺身邊咁話。冇後顧之憂，梗係瞓身搶票啦！