禽流疫魔又重臨 官僚反應慢幾拍

唔知點解，禽流感似乎對香港情有獨鍾，總係揮之不去，耐唔耐就爆發一次，耐唔耐就嚇人一驚，簡直防不勝防。嗱，話口未完又嚟喇！

衞生防護中心證實一名兩歲男童確診感染禽流感，目前喺瑪嘉烈醫院接受深切治療，情況嚴重。至於病因呢，當局聲稱仲調查緊喎。

禽流感重臨香江唔出奇，最奇怪係衞生防護中心公布疫情足足慢咗幾拍。呢名本港男童一直喺廣東生活，上月廿三日開始發燒及流鼻水，廿六日來港後喺旺角一間私家診所求醫，至廿八日出現抽筋情況，前往明愛醫院急症室求診，懷疑感染腦炎，檢驗後發現男童嘅咽喉分泌物有禽流感病毒，前晚轉到瑪嘉烈醫院傳染病房接受隔離治療。

試諗吓，呢位病童廿三日已發燒及流鼻水，廿六日來港後周圍求醫，但衞生防護中心後知後覺，搞咗咁多日至可以證實感染禽流感，你話係咪慢咗幾拍吖？好彩禽流感據講暫時唔會人傳人咋，否則，呢位病童來港咁多日至被隔離，期間都唔知接觸咗幾多人，隨時爆大鑊都似。唔係嚇你o架，沙士教訓歷歷在目，當年就係一位來自廣東嘅病人喺香港通街走，周圍散播病毒，結果千幾人受感染，死咗近三百人，搞到香港雞毛鴨血，唔通港產官僚咁快就唔記得？

話時話吖，禽流感近年一直揮之不去，港府應該有豐富嘅防疫經驗至係o架，點解今次反應仲係咁遲鈍呢？點解化驗禽流感病毒仲需要咁多日呢？唯一嘅解釋係，當局根本冇吸取教訓，依然係渾渾噩噩，依然係漏洞百出。叮，靠佢哋把關喎，唔擔心就假！

呢，食衞局局長周一嶽最叻馬後炮，今次禽流感病例證實之後，佢例牌出來補鑊做騷，又話已啟動嚴重應變級別，又話會加強監察和化驗，又話已設立熱線電話供查詢，似模似樣咁。其實，講多無謂，食多會滯，當局唔好好把關，等到疫魔攻陷香港至嚟補鑊，至嚟做騷，乜都遲喇。防範勝於治療吖，知冇？

咪話太一叮唔提醒，港府即將換屆，今年適逢香港回歸十五周年，北大人將會親臨香港主持大局，如果喺咁嘅時候爆發大規模疫症咯喎，你班港產官僚走佬都唔掂，叮！