SUN微博：Sun畸事：與神對話（監獄版）

「675354！」

前中環民國大總統乞人曾，正踎在赤柱一個陰暗並有陣尿味的獨立囚室中，他忽然聽到一把聲音在嗌他的老冧，乞人曾惶恐地左顧右盼，以為又有懲教員要來通他的櫃，但見鬼影冇隻。當他驀然回首、驚鴻一瞥，竟看見是神在鐵窗外呼喚他。

乞人曾：神呀，你今次真係要打救吓我啦。

Gap神：已經打9咗你啦，所以你先至會喺度。

乞人曾：諗番起之前我潛水個幾月，就係為咗練習點樣谷眼淚扮道歉。

Gap神：點解呢個騷淨係得嗰三分鐘呢？

乞人曾：我當時出盡力都谷唔出眼淚，反而谷咗少少米田共出嚟，整污糟咗條褲，我咪即刻講句「多謝大家」就急急走人囉。

Gap神： 原來真係身有屎。

乞人曾：我嗰一刻直頭影帝上身，點解無觀眾buy？

Gap神：因為你個樣其實似便秘多啲，令電視機前面嘅觀眾非常不安。

乞人曾：呢度冇自由又唔可以收禮，真慘。

Gap神：冇自由可以食豉油、唔收禮咪收皮囉。

乞人曾：我係你嘅忠實fans，你一定要保佑我呀！

Gap神：放心，我會保佑你一世都食住無憂，永遠可以開公數呃飯食。

乞人曾：（大喜）真係？

Gap神：你喺度踎一世咪得囉。

此時，走廊傳來懲教員的吆喝聲：「675354！夠鐘通櫃喇！」

（花生友如有對號入座，請食自己）