霸地封錶無王管 浪費公帑話之你

香港人多車多，路邊咪錶停車位本來已經嚴重不足，加上經常無緣無故關閉，駕駛人士一位難求，唔嬲就假。

呢，申訴專員公署踢爆，由於路政署及運輸署溝通不足，互相卸責，搞到好多咪錶停車位長期關閉，嚴重浪費公帑。雖然當局三年前曾推出措施，話就話加強監管掘路工程，但不必要佔用咪錶停車位情況完全無改善。

例如有公用事業機構要求佔用五個咪錶位掘路一個月，運輸署封咗車位廿幾日之後至派人巡查，發現根本未開工。又如有公用事業機構要求佔用一個咪錶車位超過三個月，運輸署封錶個幾月後實地觀察，又係唔見開工，其後竟被告知工程已經完成，你話幾兒戲吖。事不關己，高高掛起，港產官僚矇查查任人點，監管係假，關人個關至係真，叮！

正如申訴專員話齋，今次揭發嘅問題不過係冰山一角嘅咋。講真，敷衍塞責已經成為官場傳染病，公署就小販阻街投訴嘅調查發現，政府部門執法疏懶，互相卸責，問題非常普遍。有市民○九年向食環署、地政總署及屋宇署投訴攤檔非法擴充營業範圍，而且涉及僭建，點知石沉大海，等足兩年都冇結果，違例者生意照做。申訴專員批評三個部門以種種藉口逃避責任，有法不執，令違規情況惡化。

唉，令市民失望嘅又何止呢幾個部門，曾蔭權治港七年，邊樣唔係搞到亂七八糟吖。從監管泊車咪錶位求求其其，到清拆僭建物是是但但；從解決雙非問題拖拖拉拉，到推行大型基建慢條斯理；從發展經濟議而不決，到改善民生決而不行，無論大事小事，煲呔曾政府有邊樣做得好吖？

最近立法會爆發拉布戰，有市民覺得係浪費時間，虛耗公帑，其實講到拉布，港府高官尸位素餐，蹉跎歲月，佢哋至係真真正正嘅拉布高手，相比之下，立法會議員不過係小巫見大巫咋。

官僚懶政，其來有自。煲呔曾由「我要做好呢份工」，變咗「貪威識食等收工」，上樑不正下樑歪，老細一味諗縮數，下屬練精學懶混日子，做一天和尚撞一天鐘，又有乜出奇吖，叮！