政壇：搞搞政：拉布捱到殘 冇人撐Greg蘇

立法會拉布戰尋日總算告一段落，一眾建制派議員由上月初開始日以繼夜、夜以繼日表決出缺機制草案嘅千幾項修訂，尋日終於否決晒，緊跟出台嘅就係討論多年嘅競爭條例草案。據聞，商務及經濟發展局局長蘇錦樑（Greg）想議會嗱嗱聲傾，原定打算喺今日開始二讀，早前佢仲出口術游說議員務必要出席為草案保駕護航。不過，尋日卻證實佢打鑼搵人都冇用！

事關連日狂踩開會，建制派議員都散晒，三十幾名建制派議員中，唔少人都坦言攰到爆，私底下擔心人數不足會流會，索性打算今日唔再續會，競爭法惟有延遲到下禮拜傾。議員有心無力又好，拉布變拉柴又好，總之，Greg蘇要乾手淨腳嘅希望就破碎嘞。

有知情人士話，驚唔夠人開會只係個冠冕堂皇嘅藉口，實際上要湊夠人數開會並唔困難，只係佢哋畀人拉布拉到身心俱疲，於是打退堂鼓停一停、抖一抖啫，完全當之前Greg蘇嘅呼籲冇到。