政壇：聯想楊元慶年薪破億

中港打工皇帝嘅薪酬距離愈嚟愈窄，正式接任聯想董事局主席嘅楊元慶最近薪酬大曝光，聯想年報披露，楊元慶喺剛過去嘅財政年度，總薪酬上升19.6%至1,421.8萬美元（約1.1億港元），薪酬進一步逼近有本港「打工皇帝」之稱嘅和黃董事總經理一年所𢭃，和黃揸Fit人去年年薪為1.7億港元，而楊元慶嘅薪酬即使同主要競爭對手HP（惠普）相比，人工亦唔會輸蝕。

年報披露，楊元慶喺三月結嘅財政年度基本薪金按年上升17.6%至107.2萬美元，至於佔整體人工比例最重嘅酌情獎金同長期激勵獎勵，就分別達516.8萬美元同775.4萬美元，以埋單計算嘅1,421.8萬美元，佔聯想去年4.73億美元盈利約3%左右。不過呢份人工，當然唔包括佢之前減持股份嘅帳面收入，同持有近9%聯想股份所收嘅股息。

聯想作為一家中資企業，楊元慶嘅人工被質疑有偏高之嫌，但據外電之前引述美國證監會嘅資料，聯想主要對手HP行政總裁惠特曼(Meg Whitman)，雖然只收取1美元象徵式嘅底薪，但計埋各類花紅同股權收益，其實際人工達1,650萬美元。若以蘋果公司總裁庫克去年估計達3億美元人工嚟計，楊元慶嘅薪酬真係高處未算高。