政壇：內地幹部車泊EQ選區
九月嘅立法會選舉中，新界東備受矚目，尋日網上瘋傳一架掛住代表「內地幹部」嘅「FV」車牌房車，疑似駛入咗馬鞍山頌安選區，有人即時聯想同選舉有關。盛傳獲西環力撐、專業形象色彩濃厚嘅沙田區議員葛珮帆（EQ）喺區內扎根，問到佢呢件事，EQ即斬釘截鐵擰晒頭，佢笑言，如果有啲咁得意嘅嘢應該有人同佢講喎，不過，佢都話估計呢排都會有好多謠言同抹黑。
根據網民上載嘅相片嚟睇，呢架掛住代表「內地幹部」嘅「FV」車牌房車，係直接駛入屋邨嘅花園行人專區停泊，有人估計架車係由消防通道進入嘅，即係得到房屋署批准，究竟做乜真係唔知道。