政壇：政協常委勢大換班

香港嘅十幾名全國政協常委喺政界地位崇高，歷來都係政商界中人明爭暗鬥爭位嘅戰場，不過，全國人大政協將喺明年換屆，政協常委更面臨大換班，據聞北京有意趁換屆增加政協常委嘅基層人士同專業界代表，平衡吓工商界人士嘅比例，而新一屆政協常委嘅多個港區席位亦有換人壓力，有人因為年齡問題、有人因為捲入調查中嘅案件，總之一場落車、上車遊戲將展開。

五年一屆嘅人大政協換屆喺建制派內部掀起一場爭奪戰，政協常委嘅「卡位戰」更為激烈。現時屬於香港嘅十六名政協常委已出現多個空缺，包括已病逝嘅徐展堂、候任特首梁振英（CY）因為做特首而騰出空缺，而楊孫西就可能因為年齡問題要退下火線。至於遭廉政公署調查嘅前政務司司長許仕仁同捲入新地案嘅郭炳湘，亦未知有冇得留低。

林淑儀補位熱門

心水清嘅政壇中人話，依家十六名港區政協常委有工商界背景嘅有十二人，佔整體四分之三，希望增加基層同專業背景嘅人。講到基層代表，自然首推高舉親中旗幟嘅工聯會，該會較為人熟悉嘅政協委員有工聯會會長林淑儀同「票后」陳婉嫻，坊間相信嫻姐好大機會循超級區議會議席重返立法會，基於立法會議員做政協常委嘅例子較少，所以林淑儀嘅行情被看高一線。不過，亦有政圈中人提醒，唔好低估廣東社團總會主席王國強嘅實力，因為佢曾出任九龍城區議會主席多年，同地區基層有深厚連繫，可能係基層代表嘅人選之一。

至於專業代表方面，CY上任特首後，如無意外會辭去政協常委專心做好本身工作，但要搵同CY差唔多資歷嘅專業人士補上並唔易，至今尚未傳出合適人選，但隨住換屆日子趨近，預料有關方面都會加緊啲。