一蚊雞騙租官地 蠢官僚大腦麻痹

如果話，官僚部門嘅特點係又懶又蠢，咁地政總署都算係佼佼者咯。遠嘅唔講，元朗官地被人霸佔十八年，就係經典之作！

地政總署懵到上心口，新界鄉紳如果想畫地為王，根本唔使講打講殺，又砸車又潑糞咁大陣仗。呢嗱，有人只係用一蚊雞，就可以租地搵錢十一年！唔信？聽吓申訴專員點講啦。

地政總署現時有五百七十幾塊官地，以象徵式一蚊租金租畀非牟利團體提供服務，但係被揭發問題多多。其中一間機構九四年透過呢種形式租地，聲稱開辦非牟利小學，到九九年學校改為牟利性質，地政總署接獲市民投訴，居然闊佬懶理。

公家土地淪為私人發財工具，地署官僚懵然不知，已經抵鬧，點知接到舉報仍然闊佬懶理，淨係象徵式查問學校兩句，學校自稱仲係非牟利團體，就停止跟進，關人個關。結果直到一○年，呢個一蚊雞租地騙局先至被拆穿，學校以後要每年繳交四十萬元市值租金，但係過去十一年嘅四百幾萬租金已經追唔番。

叮佢個鎯鎯！地政總署根本由頭到尾都係草率兒戲，敷衍塞責。你話嘞，本港官地由呢個懶到出汁、懵到入骨嘅部門打理，要侵佔官地係咪話咁易吖？學土豪劣紳咁橫蠻霸佔又得，好似蠱惑學校咁詐傻扮懵亦得，得咗！

嗱，地署官僚真係冇心冇肺o架，有官地被人濫用謀利，佢哋固然懵吓懵吓，有官地白白丟空荒廢，佢哋一樣十吓十吓。申訴專員踢爆，有團體九三年以象徵式租金租地辦戒毒中心，地政總署九六年巡查時發現土地原封不動，居然懶懶閒置之不理，直到一○年至終止租約，令官地白白荒廢咗十七年。

咁都未算呀，申訴專員黎年係咁講嘅，今次調查咗五十幅地，發現地政總署全部無詢問過有關部門就自動續租，有部分官地更被違規興建寮屋同飯堂，超過十年未糾正。

係人都知，土地係香港最珍貴嘅資源，買少見少，地政總署疏懶失職，大量官地唔係被人霸佔侵吞，就係被荒廢餵蚊，該當何罪吖！講到呢度，太一叮實在有少少擔心，你知啦，「痛心特首」曾蔭權貪盡海陸空，萬一大家有樣學樣，個個走去捐窿捐罅佔便宜，以地政總署嘅懵丙程度，免費官地必然成為搵着數頭號目標。莫講話五百幾塊地，就算有五千塊、五萬塊，都好快被霸晒o架咋！

喂，地政總署署長譚贛蘭，唔該唔好再大腦麻痹，糟蹋官地喇，叮！