政商定格：信銀邀釀酒名家教投資
信銀國際之前搞咗個名畫同藝術品投資活動，今年就瞄準紅酒市場，請到名氣同國際品酒師Robert Parker（RP）齊名嘅世界級釀酒師Michel Rolland教客戶飲紅酒兼投資，好似國際銀行業務總監黃致遠等都齊齊到場聽吓大師心得。
Michel Rolland依家喺12個國家超過100間酒莊做釀酒顧問，聽聞佢喺法國加盟傳統酒莊後，酒莊副牌紅酒出品，仲靚過佢加盟之前嘅正牌，所以畀人話佢點石成金。其實見到佢，可能問定佢嚟緊去邊間酒廠做顧問，買定酒花都有得賺。
今次活動信銀國際有超過30個私人銀行客，飲到Michel Rolland出品佳釀之餘，仲有佢親筆簽名嘅紅酒送。睇怕佢哋肯定唔捨得飲，擺落酒窖等升值。
信銀國際請嚟世界級釀酒師Michel Rolland，一邊教品酒，一邊教投資。