搞搞政：李國麟係無間道？
出缺機制草案修訂嘅拉布戰預計喺今日結束，除人民力量黃毓民死守外，其他二十三名泛民議員繼續杯葛會議。不過，尋日網上就廣泛流傳一段短片，內容講述泛民嘅衞生服務界議員Joseph李國麟，前晚七點半鐘復會時靜雞雞走入會議廳幫建制派湊夠開會人數，免於流會。吓！唔通佢係無間道，歸邊建制派？
Joseph話嗰晚喺前廳用緊電腦期間，政制及內地事務局副局長黃靜文突然衝埋嚟，話石禮謙去咗洗手間趕唔切返入會議廳，想佢幫手入去湊夠法定人數。於是佢好聽話咁入咗去，但坐唔夠一分鐘就見到石禮謙同霍震霆施施然趕到，於是佢即刻離開會議廳，根本冇參與投票環節喎。
佢覺得自己嘅行為完全冇問題，又話流會搞到乜都停晒真係完全冇好處。雖然佢嘅解釋不無道理，但講到尾有啲政治原則始終要堅守嘅！
設計圖片