競爭優勢正弱化 香港發展如龜爬

大家都聽過龜兔賽跑嘅古仔o架啦，香港係嗰隻烏龜吖，定係兔仔呢？答案係，你答龜同兔都啱。點解？咁啦，就用一單新聞嚟解釋。

中國社會科學院公布兩岸四地城市競爭力排行榜，香港力壓台北同北京等二百幾個城市，連續十年排頭位。嗱，咪開心住呀，社科院跟手指出，香港同內地嘅差距正逐步收窄。呢句至係戲肉呀，老友！

逆水行舟，不進則退。排名第一不足言喜，事關被對手不斷追趕，追下近啲，追下又近啲，被人爬頭只係遲早嘅事。

嗱，唔係長他人志氣、滅自己威風，香港前景堪憂係有根有據㗎。社科院老實不客氣咁話，香港嘅稅收、人才同軟硬件優勢都正在不斷弱化，特別喺四大方面，問題最為突出，就係：租金高企、人口老化、輕視科技發展、政策不利吸納外來人才。內地「四個現代化」曾經係經濟落後嘅代名詞，依家香港出現「四個大弱化」，問你怕未！

叮佢個鎯鎯，租金高企令百業困難，人口老化變社會炸彈，係人都知呢啲係香港發展嘅阻礙。社科院知，香港人知，就係只得港府唔知，或者佢知，但係一直闊佬懶理扮晒無知。唉，香港優勢退步弱化，內地城市迎頭趕上，再咁落去，唔使等五十年，香港好快就會變成「一國一制」，淪為中國一個二線城市。

講到呢度，大家可能會話，喂，喺呢場香港同內地城市嘅龜兔賽跑中，香港好明顯就係嗰隻驕傲懶惰嘅蠢兔仔啦，點解話似烏龜呢？

哦，係咁嘅，香港與內地城市嘅差距不斷收窄，正正因為人哋跑得快，自己行得慢囉。回歸十五年，港府胡混度日，蹉跎歲月，乜嘢十大基建、六大產業，全部唔係紙上談兵，就係虎頭蛇尾。你話嘞，香港嘅發展係咪好似蟻躝龜爬吖？港府入面班庸官，係咪個個龜模龜樣吖？

話時話，香港正在弱化嘅優勢，何止得四樣。根據多項國際調查顯示，香港嘅新聞自由度不斷被收窄，廉潔指數亦有下跌趨勢。新聞自由同廉潔都係香港嘅核心價值，港府自毀長城，香港遲早失去獨特價值，同一個普通內地城市無分別。

講起香港發展龜咁慢，提起官場王八蛋，太一叮聯想到一隻政壇爬蟲類動物，就係曾蔭權。香港發展停滯不前，皆因佢在位七年，都冇做好佢份工。太一叮叮唔醒佢，都要叮爆佢呀，叮！叮！叮！