政壇：中策組貼錢外訪免留貪名
煲呔曾早前被踢爆外訪巴西時曾住五萬幾蚊一晚嘅總統套房，事後全城鬧爆「貪曾」，而由佢領導嘅夕陽政府臨收工亦特別多外訪團，畀外界質疑係公費旅遊。
作為煲呔曾智囊嘅中央政策組亦計劃喺下月九至十三號到福建同台灣考察，首先會到福州出席「兩岸四地智庫論壇」，之後會轉赴台灣高雄參觀當地兩間大學，最後去台北出席國民黨國策基金會舉辦、名為台灣經貿文化合作同香港喺兩岸ECFA功能嘅座談會。
不過，咪以中策組有份為煲呔曾出謀獻策，就可以同佢一樣可公費旅遊，據聞有人計過連機票同酒店住宿在內，中策組非全職顧問至少要自行「倒貼」五至六千元先得喎。話時話，話晒非全職顧問出外考察都係幫政府做事，就算畀啲津貼佢哋都係人之常情，總好過畀煲呔曾巧立名目將啲公帑倒落鹹水海喇！