政壇：娥姐撲火愈燒愈旺
【本報訊】候任特首梁振英同候任辦主管羅范椒芬都講過，希望下屆政府唔好只係救火，而係要將目光放遠啲，但盛傳會做下屆政務司司長嘅發展局局長林鄭月娥竟然唔識救火。
話說林鄭尋日參觀一個職業安全物品展覽時，想親身試下點樣用模擬滅火筒救火。呢個係非一般滅火筒，因為火頭係用投射螢幕顯示，要拎起滅火筒按掣，隔空瞄準火頭，滅火筒嘅感應器就識得發訊號撲熄火頭。
因為操作要有技巧，工作人員一邊講解，一邊示範，林鄭都好留心聽o架，但到佢親自試時，見佢一路將滅火筒噴嘴對準火頭，火頭竟然愈燒愈猛，側邊嘅工作人員即刻提佢：「要將感應器瞄準火頭先得o架！」火種終於熄咗少少，但仲燒得好勁。試玩一輪嘅林鄭呢個時候只有放棄，仲以笑遮醜話：「如果叫我救火就唔得喇！」在場嘉賓都幫佢打圓場：「真係要訓練過先識用嘅。」
林鄭滅火，火勢愈燒愈猛。