政壇：扮嘢文癡癡的等

喺特首選舉之後，唐營人士會唔會喺公職領域中消失一直惹人關注，其中支持唐唐嘅「扮嘢文」盛智文，喺海洋公園主席嘅任期嚟緊六月尾就會完，之後何去何從？佢就話仍係「等待中」。其實佢已經做咗九年海洋公園主席，遠超任公職最多六年嘅不成文規定，如果再被委任或者會惹人詬病，但如果唔委任佢，又可能會被解讀成秋後算帳，候任特首CY梁振英今次真係左右為難。

不過，近日又有傳聞話扮嘢文將會繼續有得留低，做多海洋公園主席至少一年。佢尋日話的確有相關人士同佢講過或者有機會繼續出任海洋公園主席，但一切係非官方嘅消息，所以六月以後嘅去向，佢話自己都係好被動，一切都係「等待中」！

任職九年冇收人工

扮嘢文話選舉過後，其實大家都要繼續向前走，而佢同CY本身都係朋友。佢又話即使真係再被委任都冇有怕，自己過去九年冇收人工，但都將海洋公園搞得好地地，如果單因「六年所限」唔畀佢繼續做主席，咁對佢都好唔公平。

佢講得咁有霸氣亦絕非無道理，事關佢做海洋公園主席九年期間，公園入場人次節節上升，八度衝破年度入場人次紀錄，即使香港迪士尼樂園開幕，入場人次仍有增無減，今年四月仲創新高，破紀錄有六百萬人次添！

眾所周知，因為佢鍾意扮鬼扮馬，幾乎海洋公園有乜新節目，佢都粉墨登場，以出位嘅造型嚟造勢，又樂在其中，因而有扮嘢文之稱，若果佢續任公園主席嘅話，咁就可以繼續扮嘢喇！