有加冇減賺到盡 遲早肉糜食唔起

油價加快減慢大家聽得多，肉價加快減慢甚至有加冇減，除咗師奶之外，好多人可能唔知。其實，相對於「油魔」食水深，「肉魔」賺到盡，對民生嘅影響更大o架！

消委會踢爆，新鮮豬肉批發價同零售價嚴重脫節，即使活豬批發價去年第四季已由高位回落，但零售價仍然高企，部分減價速度緩慢甚至冇減價。以去年一月至今年三月嚟講，新鮮豬肉零售價及批發價嘅差距擴闊咗兩成六咁多，由去年一月每斤相差約二十一元，擴至今年三月相差逾二十七元，連消委會亦忍唔住出聲要求肉商減價回饋消費者。

聽吓肉商點樣講先。佢哋指租金上升未有喺零售價完全反映，先至令人覺得加快減慢；加上人民幣匯率高企及通脹因素，未來新鮮豬肉價格回落空間有限喎。在商言商，做生意梗係想賺多啲，不過咁，凡事都要合情合理，活豬批發價已回落咗差唔多兩成，而零售價就幾乎冇減過，食水咁深，點講都唔通啦，係咪？

眾所周知，豬肉係大多數市民日常生活不可或缺嘅主要糧食，正如古人所講，「無肉令人瘦，無竹令人俗」。而更重要嘅係，肉價上升，其他食品價格亦必定水漲船高，對民生影響好大o架。呢，年前內地豬肉價格急升，搞到民怨沸騰，國務院要召開專門會議商討對策添。所以話，大家千祈唔好睇小呢隻豬，肉價愈來愈貴，遲早連「肉糜」都食唔起吖！

最令人莫名其妙嘅係，有大型超市因應豬肉來貨價下跌，以折扣價出售新鮮豬肉回饋顧客，大受消費者歡迎，點知竟然惹起軒然大波，唔止豬肉業界強烈反彈，政客亦加入聲討，又話壟斷，又話霸權，簡直九唔搭八。肉商唔肯減價都算喇，家陣連超市減價都唔畀，究竟邊個先至係霸權吖？講多冇謂，食多會滯，對於消費者嚟講，邊個係霸權都無所謂，最緊要可以買到平豬肉，呢樣嘢最實際。正如有立法會議員話齋，肉商賺到盡食水深，只能靠消費者力量懲罰無良奸商。

講到尾，無良奸商之所以予取予求，除咗因為消費者唔知豬肉批發價，只能任人宰割，夕陽政府翹埋雙手唔監唔管，亦難辭其咎。有人提議設立肉價監察委員會，訂立措施平衡市場及代理商嘅運作，完全行得通o架，弊在港產官僚懶得就懶，關人個關，叮！