SUN微博：打橫嚟講：屁股開花，無縫交接

政治呢家嘢，真係一日都嫌多啊！

那個林公公接班人譚志源大局長畀「拉布戰」搞到腎都虧埋之際，竟有空餘，失驚無神，在沒有任何動靜或諮詢下，撲出來公報下屆政府問責官員可以大幅加薪，乜佢好得閒咩？當然唔會啦！事情並非「加人工」咁表面簡單嘅！

正當大眾因那群廢柴垃圾官吏有人工加而媽媽聲時，第二日竟見梁營振英哥的第一號跟班張震遠以那甚麼乜叉「薪酬趨勢調查委員會替任主席」之身份傻吓傻吓咁走出來宣布公務員加薪消息，哦！咁就明白晒啦！

煲呔一定知張震遠會做代表出來講公務員加薪之事，遂早佢一日派譚公公搶閘，先辣慶民憤，等呢件梁營懵丙張跌落屎氹。打狗看主人嘛！

公務員加薪方案幅度低過問責官員，肯定叫十六萬公僕不滿，從而分化兩組人；此外，全港市民看穿問責官員廢到嘔時，梁班子仲要加人加錢，架床疊屋大花筒，人未上任已被大眾（目及）實，兼有排鬧，增加將來施政困難，分分鐘七一前都埋唔齊班噃！

煲呔擺明玩殘高佬梁啦！好心你張震遠身為頭號擦鞋仔，就醒啲啦！點會出來硬食受靶o架！扮痔瘡爆臨時缺席，也不能影衰老細啦！懵丙！

煲呔政治智謀叻過振英哥九條街。兩人玩嘢玩到出晒面，互插到屁股開花，仲話過渡順暢，無縫交接喎！哈哈！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係咁爆：通宵拉布有咩好做?

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係咁爆」網址：tv.on.cc/hot