政壇：搞搞政：黃家和AO資歷聘文員

我哋尋日收到讀者一封電郵，內容係分享佢老友嘅「求職怪事」，話說佢老友去咗香港餐飲聯業協會應徵做「項目助理文員」，明明入職只需要中五程度，點知面試後要寫兩篇十足論文嘅中英文致謝辭同邀請信，分別畀特首同食環署署長，仲要分析過去三十年飲食界同政府合作嘅環保項目計劃嘅成果及得失。

讀者質疑，你估依家考政務官（AO）咩，咁難，至少要有關於環保生態學術研究嘅碩士或博士學位先得。此外，做呢份工仲要識網頁設計、網頁編寫添。就係咁，呢位讀者嘅老友白走一趟。

問番餐飲聯會長黃家和，佢話好少過問餐飲聯請人嘅事，因為由人事部負責，佢亦唔方便去干預部門用乜準則請人，但佢話會返去了解，如果發現要求過高，或會建議降低要求喎。

梗係啦，咁高要求，睇怕盛傳下屆可能冇得留低嘅環境局局長邱騰華先至合晒所有要求。