政壇：民主阿婆廢噏撐仇家

喺香港政壇已經冇晒角色嘅「民主阿婆」陳方安生，尋日又再不甘寂寞上電台發噏風亂鬧人，由煲呔曾到候任特首CY梁振英都畀佢鬧勻，最後仲曲線暗撐激進泛民主派嘅拉布行動，擺明係想阻撓新舊政府交接。民主阿婆話晒都做過政務司司長，依家事不關己就說三道四，最慘係亂噏完都冇人理佢，不如慳番啖氣返屋企湊孫好過啦！

早已同煲呔曾斷絕「姊弟情」嘅民主阿婆，喺節目中大鬧煲呔曾政務官出身，卻帶頭擴大高官問責制打擊政務官，令佢哋唔敢再向上級直言進諫，士氣一落千丈，講得好似好有道理咁。不過，佢話鋒一轉，又批評CY提出嘅政府架構重組方案無充分理據同無迫切性，增設副司長係架床疊屋等，叫CY上咗場、了解咗政府運作後先決定點做喎。

民主阿婆之後愈講愈離譜，形容立法會拉布戰針對嘅出缺草案係一條惡法，既然議員無其他方法阻止草案通過，就乜嘢可行策略都應該考慮喎。須知拉布三人組過去多次批評民主阿婆「忽然民主」，民主阿婆亦多番譴責佢哋嘅掟嘢爆粗、示威暴力同分化泛民嘅行為，但佢依家為求阻撓新舊政府交接，竟然認敵為友暗撐拉布三人組，無晒原則同準頭，認真悲哀。