政壇：蠱惑單非B周一鑊無符

有「每周一鑊」之稱嘅食物及衞生局局長周一嶽，辦事不力搞到大批內地孕婦湧港生仔，立法會議員涂謹申尋日就質詢，話如果有內地婦人喺懷孕後同老公離婚，之後再同港人結婚，所生BB就能成為香港永久居民，點樣防止呢類「雙非」變「單非」嘅情況？點知周一鑊就亂噏，話依家愈嚟愈多夫婦鍾意先大肚後結婚，當局根本冇可能分辨呢啲夫婦係咪假結婚喎。

阿涂之後要求政府為單非BB驗DNA核實生父嘅港人身份，但周一鑊就話當局冇權為呢啲單非BB驗DNA，只會抽查單非父母提交嘅文件，包括港人喺內地結婚前，先要喺香港申請俗稱「寡佬證」嘅無結婚證明書。佢又話呢啲BB生父係邊個，當局根本冇權去核實，亦唔可以決定邊個係BB嘅爸爸，因為呢個主動權喺BB嘅媽咪度喎。

不過，單身港男要申請「寡佬證」絕對無難度，為雙非孕婦提供來港產子嘅渠道，反映周一鑊始終未有辦法解決內地孕婦同港人假結婚嘅情況，難怪阿涂尋日就要求佢向全港市民道歉啦！