政壇：鬍鬚曾出醜留手尾

財爺鬍鬚曾尋日結束訪台行程返港，但佢喺訪台期間搞出嘅政治風波卻陸續有來。

佢先係冇吸取上次訪台以廣東話發表講話，遭當地傳媒抗議嘅教訓，今次繼續全程粵語，搞到好多人唔知佢噏乜，失禮死人。

跟住前日有多名喺台灣大學讀書嘅香港學生，先後到台灣香港經貿文化辦事處同信義誠品書店抗議，指煲呔曾同鬍鬚曾都唔係民選產生，冇資格代表佢哋，期間同在場保安爆發幾次衝突，有學生身體多處受傷。

陳菊要求追究國民黨

點知咁都未夠，傷人事件仲有手尾跟，有關事件發展到成為台灣在野民進黨攻擊執政國民黨嘅政治工具。

民進黨代理主席陳菊尋日就咬住呢單嘢大做文章，發表聲明狠鬧國民黨政府嘅處事手法，認為事件令台灣民主蒙羞，話「使台灣這塊民主淨土出現違反人權的租界」，罪名相當嚴重。陳菊仲要求民進黨黨團立委，追究相關單位同人員嘅責任。

同時，鬍鬚曾今次赴台期間拜會台灣陸委會主委賴幸媛、台北市長郝龍斌、文建會主委龍應台等官員，本應客隨主便，卻喧賓奪主。據消息話，台灣相關部門原本諗住公開媒體採訪鬍鬚曾拜會行程，但佢難登枱面，要求低調，台灣政府為咗尊重來客，被迫臨時取消已發布嘅公開行程，搞到原本可彰顯港、台雙方交流密切嘅大好機會，平白錯失。

唉！即係仲有大把手尾跟，諗唔到鬍鬚曾既失禮人，又未搞好港台關係發展，就先為對方添煩添亂。佢今次訪台真係唔去好過去啦！