正街只聞電梯響 官僚拉布十五年

立法會拉布鬧劇沒完沒了，令人嘆為觀止。其實講到拉布咯喎，大家知唔知邊個最勁呢？反對派議員？保皇黨政客？都唔係。答案係港府！

嗱，太一叮咁講有憑有據o架。反對派拉布頂盡咪幾個月，但特衰政府興建一條扶手電梯，大家知唔知拖咗幾耐呀？係十五年！你話港府榮膺「拉布王」係咪當之無愧吖？叮！

呢個一直「只聞電梯響」嘅工程位於西環正街，回歸時已經拍板興建，以紓解街坊日日撐長命斜之苦。但係工程拖到○九年先至動工，其後一拖再拖，至今竣工遙遙無期。街坊梁婆婆話：「總會起好嘅，但可能等到死都睇唔到！」無奈之情，溢於言表。

更無奈嘅係班商戶，唔止因為工程沙塵滾滾而生意大減，為遷就工程而搬舖嘅都唔知幾時可以遷回原址。當然啦，工程拖拉嘅另一後果係造價飆升，四年間急增一倍至六千萬元。即係話，全港納稅人都係受害者。

議而不決，決而不行，向來係港府施政特色，但都唔好拉布得咁過分吖！十五年，赤鱲角機場都起好啦。港產官僚係咪認真做事，係咪急市民所急，一個電梯工程就睇到晒。嗱，立法會議員就講得啱嘞，如果條電梯起喺禮賓府，路政署一定唔會慢吞吞！

話時話，一條扶手電梯拖足十五年並唔係個別事件，類似嘅荒謬情況喺香港不斷上演。小至海濱長廊、新界單車徑，大至十大基建、六大產業，有邊樣唔係拖拖拉拉蹉跎歲月？反對派搞拉布為咗癱瘓政府，計太一叮話齋，港府施政早就陷入癱瘓狀態，唔使議員拉布，超級拉布王已經自動癱瘓、提早拉柴啦，叮！

咪話太一叮唔提醒，社會發展猶如逆水行舟，不進則退，香港呢樣又拖幾年，嗰樣又慢幾拍，遲早被周邊對手超越o架咋！

冇計啦，上樑不正下樑歪，港府高層烏煙瘴氣，唔係貪腐成習，就係胡混度日，官僚部門咪得過且過，敷衍塞責囉。睇官場僭建俱樂部陣容有幾咁鼎盛就知啦，曾蔭權上年被本報踢爆僭建醜聞，家陣又嚟一個食衞局局長周一嶽，成班高官知法犯法，徇私瀆職，施政冇可能唔一塌糊塗，停滯不前。

一句講晒，夕陽政府冇心冇肺冇靈魂，一個正街電梯工程正正就係成個香港嘅縮影，惟有寄望下屆政府撥亂反正，叮！