SUN微博：打橫嚟講：思歪，急自己所急

自梁振英宣布參選特首起，坊間便瘋傳話佢份人好奸、心術不正、老謀深算，連掃把頭也四圍打電話篤佢會害人，講到CY好似東廠首領咁賤格得人驚。

老友！上述謠傳，全屬胡言狗噏，信唔過！吓！點解我敢咁講？

嗱！睇吓CY這兩日，頻頻四出落區，打親民牌時的表現，便可證實小弟我之所言不虛矣！毓民、大舊、長毛三議員，在立法會內玩拉布，面帳係阻截議員出缺機制法案，和網絡23條版權法例修訂的通過，實則係打殘CY新政府改組方案，咁都未算堅，主要係打沉振英哥的氣燄，唔畀佢上任前便指手畫腳牙斬斬，有示警意味，否則，往後仲有排佢頭痛也！

我睇唔到梁候任特首的才智及領悟力有幾高，只見佢借落區機會，有傳媒在場，便不理街坊市民問乜都好，佢都係林公公上身，變咗人肉錄音機重播，狂鬧立法會拉布，不特止「亂局拉布三雄」唔啱，唔出席的議員（連建制派的）也不負責任。當然，畀佢曾經奪命追魂call而棄選特首的曾鈺成主席也做得不妥喎！CY敗壞氣急得方寸大亂，還公然挑撥市民九月立法會選舉時懲罰搞局的人，咁有損選舉公正之事，也自己出手，可見佢個人都唔奸得去邊啫！

CY批評立法會拉布會窒礙社會發達、窮人上樓，但理據不足無人睬佢，資質咁低的人，比煲呔也不如，你哋驚佢乜吖？放心！放心！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊鬧爆夕陽政府

就係敢爆：胡椒噴霧好使好用？

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot