政壇：搞搞政：象哥扮瞓覺自辯露底
立法會聽日再次審議替補機制草案，建制派議員正打算通宵開會力敵「拉布三人組」，今早將有決定。患有睡眠窒息症嘅建仔議員「象哥」黃定光，就話自己通宵都頂得順。
上禮拜象哥「頭岳岳」瞌眼瞓，畀社民連嘅長毛當場捉住，話擔心佢身體有問題喎！象哥即時澄清當日只係「扮瞓覺」，又話：「所以毓民一叫我就醒！」喂！叫醒佢嗰個係長毛唔係毓民喎，究竟佢真瞓定假瞓呀？
政制及內地事務局局長譚志源尋日就話，佢三十年前做大學宿生會委員時已有豐富嘅通宵經驗，而局方聽日亦會調配剛大學畢業嘅年輕同事擔任「全程監察小組」（即係議員狗仔隊），人手會增加一倍至四十人，佢又提醒一眾年紀較大嘅議員要多飲湯水備戰。
設計圖片