政壇：Hea足27年 李國寶不露了

尋日有報道話，喺立法會Hea足二十七年嘅立法會四大懶蟲之一李國寶，終於捨得引退，但佢臨別遺言竟然話從政嘥時間，所以勸兩個仔唔好涉足政壇，跟住仲反過嚟點名力撐中銀香港信託董事長「星爺」吳亮星繼任。李國寶多年來「三點不露」，到一到又走，出咗糧唔做嘢仲嫌份工辛苦，何解佢連選連任達九次（連埋選臨時立法會），到今時今日至後知後覺話嘥時間呢？

鮮有接受專訪嘅李國寶懶係辛苦咁話，立法會要全職做，好難同時兼顧兩份工，跟住又忽然感慨，覺得政治係「waste of time（浪費時間）」，並且扮晒心灰意冷咁話「I wish I never entered（我希望自己從未涉足過）」，所以唔會勸兩個仔踩入政圈。

星爺暗踩「三點不露」

估唔到平時絕少喺立法會發言嘅李國寶，辯才原來咁叻。人所共知，佢喺立法會會議廳嘅議員座位長期丟空，由四十六歲做議員做到七十三，張櫈依然係一張冷板櫈，而一切有關佢嘅新聞都係負面嘅，好似僭建、美國道瓊斯內幕交易案，若果唔係因為佢係小圈子嘅功能組別議員，佢張櫈早就畀人坐咗啦！

一直有傳聞話，李國寶霸咗個議員位咁耐，當正議席係自己私有財產，打算轉畀大仔李民橋，但經過特首選舉後，佢嘅深唐身份已成為負擔，莫過話傳位，怕且佢連連任都未必得。故此近期由星爺接棒嘅呼聲愈嚟愈高，只差在等李國寶表明去意，依家佢反過嚟自爆力撐星爺，再次證明其實佢倒果為因嘅功力已臻化境。

星爺就衷心多謝李國寶咁睇得起佢之餘，亦表示咁多年來李國寶都算「有功有勞」嘅，之不過市民唔希望議員「三點不露」呢個要求亦好公道，所以寄語李國寶「有則改之，無則加勉」。對於李國寶嘅政治嘥時間論，星爺好婉轉咁話，「另一角度都係服務市民啫」，仲講明如果佢做議員嘅話，一定會放好多時間喺立法會。