無良書商撳住搶 無能政府吹唔脹

港府同書商就教科書定價打口水戰，高官扮晒魚蝦蟹，七情上面，點知書商根本唔賣帳，書價加多減少，鬧劇收場。教育局淪為無牙老虎，學校家長繼續做羊牯，搞嚟搞去得個吉。

教育局副局長陳維安終於認衰，話書商分拆教材進度令人失望喎。梗係喇，新學年仲有六成教科書未分拆教材，書價平均加幅百分之四，而分拆教材嘅教科書平均亦加百分之零點五，離書商當初承諾減價一成，簡直差天共地。

嗱，衰咗要認，打就要企定。書商違背承諾，課本售價不減反加不特止，分拆後嘅教師用書，售價仲貴到離譜，係學生課本一至兩倍。學校同家長任人魚肉，當局束手無策，想唔認衰都唔得喇。

唉，港府以為逼書商分拆教材就可以降低書價，結果畀對方玩番轉頭，真係搞笑。學生除咗要繼續捱貴書，仲隨時要承擔教師用書開支，未見其利，先見其弊，高官依家至知衰，遲唔遲啲吖？

講開又講，買本小說或者消閒讀物，多數幾十蚊有交易，唯獨教科書零舍貴過人，閒閒哋都要過百蚊，簡直離晒大譜，擺到明係暴利喇。書商肆無忌憚，年年加價，連港府自己都承認，係市場壟斷所致。

長期以來，當局對每年營業額十幾億元嘅教科書市場放任不管，對書商以壟斷手法飛擒大咬不聞不問，任由佢哋巧立名目，當正學校同家長係「人肉提款機」，住嚟搶。民怨爆煲，夕陽政府一直闊佬懶理，臨收檔先至突然企硬，除咗同書商反晒面，仲話要開發電子書打破壟斷，點知對方睬你都傻，照加可也，跛腳鴨政府乜架都丟晒。

叮！煲呔曾政府仲有個幾月就收皮，過去七年關人個關，乜都唔做，依家至忽然企硬，雷厲風行，似模似樣咁，其實係人都睇得出姿勢多過實際，虛應故事喇。講番開發電子教科書呢筆，家陣十畫都未有一撇，能唔能夠代替印刷教科書仲係未知之數，技術上可唔可行更加冇人知。當局失驚無神祭出呢樣所謂「撒手鐧」，擺明想轉移視線，敷衍民意啫。

退一萬步講，弱雞政府出咗名議而不決，決而不行，電子教科書就算行得通，冇十年八年都咪旨意成事，等得嚟，蚊都瞓，蛇都死啦，呢啲咪叫誤人子弟囉，叮！