政壇：搞搞政：許曉暉熱定身掌文化局？

候任特首梁振英（CY）嘅新政府新設文化局局長，原先兩名熱門人選黃英琦同馬逢國因唔同原因甩轆，政圈盛傳替補人選係現任民政事務局副局長許曉暉（Florence），尋日Florence出席一項母親節活動時唔肯回應傳聞，但講文化政策卻琅琅上口，啲內容仲同CY嘅政綱建議有九成相似，唔通Florence早已背定政綱，為新職位做熱身？

CY喺文化政綱中開宗明義話，文化政策其中一個目標係推動文化藝術同文化產業發展，鼓勵市場參與，凝聚社會力量同民間合作。Florence尋日談及推動文化工作嘅心得時，同CY嘅文化政綱不謀而合，佢相信透過政府、民間、學界同商界合作，自能進一步推展文化。

至於盛傳係下屆教育局局長嘅考評局主席吳克儉，尋日接受查詢時幾乎間接默認入閣，話教育局局長係好重要嘅崗位，如果能參與會深感榮幸。