政壇：拉布三人組召援食檸檬

人民力量黃毓民、陳偉業同社民連梁國雄組成嘅「拉布三人組」，連續兩個禮拜引發立法會流會，不過被佢哋間接軟禁喺會議廳嘅建制議員都唔係捱打，正密謀以通宵開會打體力消耗戰，圖「剪布」突破困局。毓民尋日話，佢哋三個人輪流發言拉布，體力始終有限，估計捱到兩晚通頂已經係極限，所以點名要有份參與同支持「五區公投」嘅公文袋及工黨，以至白鴿黨同民協等反對「公投」嘅泛民幫手拉布。

公文袋黨魁袋巾傑一口婉拒，話拉布拉到盡頭都係表決，不如勸政府提出終止辯論，何苦再虐待班建制派議員呢？白鴿黨張文光更講明唔會落番場，因為佢哋早就決定唔會就千三項修訂發言。工黨主席李卓人雖然冇一口拒絕，但話佢哋走入會議廳就失咗懲罰建制派嘅意義，要諗一諗喎！

泛民有咁嘅反應其實並唔出奇，前年政改一役走溫和路線嘅白鴿黨，本來贏得唔少選民認同，有乜理由走番舊路玩激進呢？即使有份搞「公投」嘅公文袋，經過區議會選舉慘敗亦經一事、長一智，知道激進路線唔啱佢哋行，「拉布三人組」嘅如意算盤睇嚟打唔響囉。