政壇：恒生新一姐怕醜快閃
恒生銀行副董事長兼行政總裁梁高美懿正式退任，一姐位置由同系嘅滙豐大將李慧敏（Rose）接棒，尋日沙田馬場舉行主席盃賽，其中一場邀請咗Rose做頒獎嘉賓，面對鎂光燈，呢位恒生新一姐似乎仲未適應到，聞記者提問亦快閃而去，同前一姐梁太嘅大方態度迥異。
Rose尋日同丈夫前電盈副主席袁天凡十指緊扣，低調現身馬場擔任嘉賓。記者上前祝賀佢升呢做恒生一姐，佢即甜笑展露迷人酒窩。不過當問到上任後有咩大計？會唔會覺得有壓力？佢即忸怩咁匿喺丈夫身後，笑稱「遲啲先同你哋講！」然後同丈夫急步離開。
李慧敏（左二）升呢做恒生一姐，老公袁天凡（左一）、馬會大董葉澍堃（右二）同李國棟（右一）都戥佢開心。