政壇：富貴黨叛將挑田少機

經濟動力同富貴黨兩個自詡代表商界同中產嘅政黨政團，近年來猶如「貼錯門神」，屢次疑似出現明爭暗鬥，經濟動力尋日忽然有大動作，喺富貴黨榮譽主席田北俊（田少）嘅新東根據地晒冷，號召最少七名區議員一字排開齊集踩場，疑似進一步拉開戰線。最搞鬼嘅係，當中有兩名前富貴黨中人邱榮光同羅煌楓，邱榮光更講到明正積極考慮喺新東出選。田少今年戰新東嘅消息傳咗多時，邱榮光呢一招算唔算向前大佬叫陣呢？

望功能組別協調有偈傾

呢次大晒冷傳達嘅政治訊息唔可以睇小，某程度亦可以話經濟動力同富貴黨嘅明爭暗鬥或一觸即發。富貴黨○八年立會選舉地區直選全軍覆沒後，林健鋒、梁君彥同梁劉柔芬等人出走，幾年嚟密密招攬人才，據聞依家已經有最少十名區議員係經濟動力嘅地區樁腳，尋日包括大埔區議會副主席文春輝、大埔區議員陳灶良、羅舜泉、何大偉等都有現身支持經濟動力嘅母親節活動，可見經濟動力喺新東嘅實力同人脈。

邱榮光尋日首次以經濟動力成員身份現身，政圈更盛傳本身有鄉事背景嘅佢會領軍喺新東參選添。邱榮光被問及此事時，話好多朋友都同佢咁講，又坦承正積極考慮；至於會否搵鄉議局主席劉皇發幫手，佢就話好尊重發叔，會同對方傾吓喎。

經濟動力突然喺新東晒冷，有政圈中人相信係有意畀啲顏色密謀派田少搶攻新東嘅富貴黨睇，等大家喺功能組別選舉協調可以有商有量，否則大家就只好兵戎相見。不過，林健鋒否認喺大埔搞活動係同任何人打對台，強調佢哋只係為香港做嘢喎。究竟富貴黨同經濟動力之後會否有更多埋身戰，大家要密切留意喇！