烽火台：撤銷苛政鬼鬼祟祟

香港勝在有東方報業集團為民發聲，伸張正義，唔係嘅話，單靠特衰政府烏厘單刀亂搞一通，真係死得人多咯。

唔係咩？港府翹埋雙手，監察特首靠東方，驗毒膠囊靠東方，家陣就連取消綜援居港限制，市民都要靠東方追問先至知。香港人辛辛苦苦賺錢交稅，竟然養埋一班渾渾噩噩嘅廢官，真係吹脹！

說來話長，長話短說，事緣煲呔曾二○○四年擔任政務司司長時好做唔做，下令綜援戶提出申請前一年不得離港超過五十六日，搞到回流香港嘅窮人徬徨無助，叫天不應，叫地不聞。卒之，○九年有人提出司法覆核，法院一○年裁定有關安排違憲，將永久居民分類造成歧視，社署諗過度過，最後決定不再上訴，撤銷苛政，回流港人終於有權申請綜援了。

但唔知點解，對於呢項影響萬幾人嘅政策改變，社署竟然一直秘而不宣，非要等到東方記者查詢才公諸於眾。有人一語道破天機，因為長者生果金設有同一限制，所以社署鬼鬼祟祟取消綜援苛政，企圖蒙混過關，迴避生果金嘅爭議。

唉，都話港府善財難捨，冤枉甘心。其實，對庫房來講，向北上長者提供生果金只係九牛一毛，煲呔曾上任七年貪足七年，好心臨走之前積啲陰德，順道取消生果金居港限制，放過啲老人家啦！