醫局瘀血不清除 醫生再多也衰頹

屋漏偏逢連夜雨，公立醫院人手不足，醫生本來已經疲於奔命，點知醫生荒未解決，退休潮又殺到，你話點算？

唔講唔知，五十年代「嬰兒潮」出世嘅醫生到二○一六年將屆退休之齡，而二○二一年又輪到中文大學首屆醫科生夠鐘退休。兩面夾擊之下，醫管局估計未來十年醫生人手短缺問題將會雪上加霜，其中專科醫生情況最嚴重。

退休潮話咁快就到，當局束手無策，除咗增加大學醫科生數目同延長醫生退休年齡，仲有就係將新落成醫院分階段運作，睇落似有招，其實冇料到。

嗱，醫科生培養需時，遠水難救近火唔在講，就算勉強湊夠數，走嘅係資深醫生，來嘅係新丁，根本無法應付需求，服務質量更加冇保證。再講，私營醫療市場財源廣進，外面大把世界，公立醫院可唔可以吸引到新醫生，延長退休年齡又有幾大吸引力，都要打個問號。

至於新落成醫院分階段運作咯喎，更加係本末倒置。醫生不足，軟件唔掂，夾硬推遲新醫院運作「配合」，直頭係削足就履，浪費資源，明搵納稅人笨，叮！

本港正面對人口老化等社會問題，公共醫療需求將會愈來愈大，但退休潮偏偏喺最需要醫生嘅時候殺到，公立醫院隨時跪低，問題都咪話唔嚴重。其實，醫生老化，皆因官僚唔化，食衞局局長周一嶽等醫療庸官淨係識頭痛醫頭，腳痛醫腳，從來冇從根本上解決問題，有乜法子唔亂七八糟吖。

話時話，香港唔係缺少醫生，而係公立醫院吸引唔到人才；醫管局更加唔係冇錢，而係啲錢用不得其所。政府醫療開支不斷增加，而公立醫院服務質素就不斷下降，醫療事故無日無之，一句到尾，係管理出咗問題。

醫管局管理無方，資源分配不公，當局諱疾忌醫，唔肯改革，搞到醫生意興闌珊，咪紛紛轉投私人市場囉。家陣十個煲僅得七個蓋，遲早得番五個蓋，問你點頂？所以話，增加醫生固然重要，但治標不治本，要改善公營醫療，唯一辦法係改革成個管理制度，對醫管局架構大執位，清除瘀血，否則做乜都係嘥氣。

講到底，慶父不除，魯難不已。新政府就快上場，周一嶽九成九冇得留低，冇咗呢舊絆腳石，醫管局重新上路，公營醫療先至可望起死回生，係咪！