政壇：搞搞政：CY追魂Call冧掂鄉事選委

候任特首梁振英（CY）行事作風果斷，早前向雙非落閘乾淨利落，尋日有鄉事派人士講到今年嘅精彩特首選戰，都透露咗件政壇漏網新聞，事關鄉議局開會討論投票立場之日，有在席選委唧噚緊係咪支持CY，有人直言CY都冇親自打電話拉票，點知句說話講完唔夠三十秒，CY就打畀佢，咁都未算，原來在場嘅另外十幾名選委都收到拉票CALL，CY打電話冇停手，睇怕就係佢變身通訊兵呢一幕拉咗唔少鄉事選委票。

鄉事選委提名時一致支持唐英年，到鄉議局開會當日，有在席選委問新界鄉議局主席劉皇發：「到底CY有冇親自打電話畀你拉票先？如果冇，大家大可唔使理佢啦，當冇件事咪得囉！」此語一出，大家繼續熱議，點知三十秒都未夠，呢個選委竟然即時收到CY電話，同日收到追魂CALL嘅仲大有人在。呢幕係咪掌握最佳時機嘅寫照呢？

講開CY，前商務及經濟發展局局長馬時亨尋日都喺電台節目上讚CY係科技股，有心有力，佢諗起喺九十年代，肥亨嘅老闆邀請CY加入一間公司做董事，點知CY做一個普通董事都特別落力過人，唔單止落手落腳做，仲畀咗好多意見。