政壇：方健儀出鏡省廉署招牌
前新聞主播方健儀最近過檔廉署做高級新聞主任，不過，唔使擔心見唔到佢，事關佢轉個頭就喺廉署主持宣傳教育節目，頭炮仲訪問審查貪污舉報諮詢委員會主席施祖祥添。貪曾事件全城關注，方健儀都好尖銳咁問施祖祥如果廉署嘅調查牽涉高官、權貴甚至特首，而委員會班成員又係特首委任，咁會唔會徇私呢？
出身官場嘅施祖祥話，委員雖然係由特首委任，但唔會徇私，仲話委員會由十二位社會知名人士組成，絕對唔會做橡皮圖章同政治工具喎，仲話如果委員認識被廉署調查嘅人士，會即時申報利益，唔會收到相關嘅調查文件，開會嗰陣亦會離場！
方健儀（左）雖過檔廉署，但頭炮工作卻依然傳媒色彩甚重，就係訪問廉署四大委員會主席之一施祖祥（右）。