政壇：阻教科書加價CY變救星

煲呔曾○七年上任後揚言要強政勵治，家吓任期將盡，除咗留下貪名外，政績衰到貼地，仲留低三大令人咬牙切齒嘅怪獸肆虐，即係樓價高到無人有、私院惡到得人驚同書商賣貴書仲可以振振有詞去投訴政府。難怪啲政黨一見教科書商咁惡，都費事再搵煲呔曾，直頭到CY辦公嘅候任辦求助，呼籲佢以處理「雙非」嘅雷霆手腕喺九月開學前，提出解決教科書問題嘅辦法。

其實國家領導人多次同煲呔曾會面時都要佢處理好深層次矛盾問題，但煲呔曾口講關心，實際手軟無力，任由市民被宰割，樓貴、生仔難困擾多時，最新蒲頭嘅書商霸權更激到家長紮紮跳，其實教科書分冊或電子教科書，政府同書商傾咗幾年，一直冇人睬佢哋，書價就一年貴過一年，到政府搵大學編電子教科書嘞，書商竟然借教師用書反擊，仲拉大隊到申訴專員公署投訴，難怪有議員戲言呢啲叫惡人先告狀。

尋晚，煲呔曾去演藝學院頒發終身成就獎畀戲劇大師鍾景輝（King Sir），佢有感而發，話尋晚係佢任內最後一次頒獎，又話King Sir一直係唔會畀人「柴台」嘅最佳男主角，所以奉佢為偶像。想唔畀人「柴台」，自己都有貨交先得o架，唔該自己反省吓啦。