政壇：高永文梁卓偉棄獎

新舊政府正值交接，政圈中人一舉一動都引嚟好多關注，今年由於煲呔曾連爆貪盡海陸空、接受富商款待等事件，搞到公務員蒙羞，人人警覺性大大加強，一般酬酢、收禮更係揸正嚟做。醫學界前晚舉行晚宴，盛傳係下屆政府食物及衞生局局長嘅醫生高永文同現屆政府特首辦主任梁卓偉（Gabriel）不約而同鴻運當頭，抽中價值不菲嘅獎品，但兩個人都敏感度十足，各自解決禮品，總之就唔落袋冇煩惱！

「唔敢收，好大壓力」

自從政圈風傳高醫生係下任食衞局局長後，佢出席親公眾場合，聽得最多嘅就係恭喜，高醫生一如以往咁唔認，但想低調卻身不由己。雖然佢態度曖昧，但運勢奇佳卻係不爭嘅事實，呢一晚佢就抽中晚宴大獎，係一圍菜單寫明有龍蝦、紅燒翅、鮑片等嘅酒席，內行人一睇，估計閒閒地價值五、六千蚊，嘩，仲唔大快朵頤？

到領獎一刻，席上已經有人搞鬼大嗌：「局長唔收得禮物o架噃！」搞到對局長傳聞不置可否嘅高醫生一臉尷尬，但佢都硬住頭皮上台領獎，轉個頭，落台便即時將酒席捐番畀醫專會，等佢哋慰勞吓義工喎！借花敬佛，花香佛身，高醫生呢一招係咪玩得好漂亮呢？

另一個有運之人則係梁卓偉，佢抽中一部頸部按摩器，價值以千元計，Gabriel笑眯眯咁話：「唔敢收，好大壓力！」跟住亦將份禮捐番出嚟，等其他人多個中獎機會。在職嘅、傳聞候任嘅官員都見禮就彈，可見貪曾嘅前科對佢哋影響幾大！

講番晚宴，出名彈得指揮得嘅Gabriel又應邀開金口，做過食衞局副局長嘅佢揀咗首《局長湊大我》嘅歌，咩嚟o架？原來係《You Raise Me Up》，佢仲拉埋周一嶽一齊唱添，係咪好識做呢？